bazar ertəsi 2 noyabr 2026 - 16:09
Xarici güclərin təzyiqləri qarşısında qətiyyət və müstəqilliyin qorunması İran İslam Respublikasının qüdrətinin əsas şərtidir

Hövzə l Sənəndəc şəhərinin cümə imamı milli müstəqilliyin və qüdrətin qorunmasının zəruriliyini vurğulayaraq bildirib ki, düşmənlərin zorakılığı və təzyiqləri qarşısında qətiyyətlə dayanmaq, ölkənin siyasi müstəqilliyini qorumaq xalqın və məsul şəxslərin ayıq-sayıqlığını, milli həmrəyliyin gücləndirilməsini, eləcə də düşmənlərin fitnə və təxribatları qarşısında vahid mövqedən çıxış edilməsini tələb edir.

Hövzə Xəbər Agentliyinin Sənəndəc şəhəri üzrə müxbirinə müsahibə verən Mamusta Məhəmməd Əmin Rasti, müstəqilliyin hər bir qüdrətli dövlət quruluşunun təməl prinsiplərindən və əsas göstəricilərindən biri olduğunu bildirib. O, hər bir siyasi sistemin qüdrətini və dayanıqlığını müəyyən edən mühüm meyarlardan birinin xarici düşmənlərin zorakılığına və hədsiz tələblərinə qarşı qətiyyətlə dayanmaq olduğunu vurğulayıb.

Sənəndəc şəhərinin cümə imamı Mamusta Məhəmməd Əmin Rasti, İran İslam Respublikasının regional və beynəlxalq müstəvidəki mövqeyinə toxunaraq qeyd edib ki, bu gün İran qüdrətli və nüfuzlu dövlət kimi tanınır. Onun sözlərinə görə, ölkənin qazandığı bu mövqe siyasi müstəqilliyin qorunmasının və xalqın İran İslam Respublikası quruluşuna göstərdiyi dəstəyin nəticəsidir.

O, düşmənlərin daim ölkənin müstəqilliyini və milli qüdrətini zəiflətməyə çalışdıqlarını bildirərək diqqətə çatdırıb ki, İran öz müstəqilliyini qorumaqda israrlı olduğu və xarici güclərin hədsiz tələbləri qarşısında qətiyyətlə dayandığı müddətcə ona qarşı düşmənçilik də davam edəcək. Bu səbəbdən düşmənlər müxtəlif istiqamətlərdə inqilaba və dövlət quruluşuna qarşı fitnə və təxribatlar hazırlamağa çalışırlar.
Mamusta Məhəmməd Əmin Rasti belə bir şəraitdə məsul şəxslərin və xalqın, düşmənin İran İslam Respublikasının müstəqilliyinə və milli qüdrətinə qarşı apardığı geniş mübarizənin müxtəlif aspektlərindən xəbərdar olmasının vacibliyini vurğulayıb. O, bu cür fəaliyyətlərə qarşı müdrik, uzaqgörən və fəal mövqe nümayiş etdirilməsinin zəruriliyini də qeyd edib.

Mamusta Rasti bir sıra regional və dünya ölkələrinin İrana münasibətində müşahidə olunan dəyişikliklərə toxunaraq bildirib ki, bu gün bir çox ölkə İran İslam Respublikasının müstəqil və qüdrətli mövqeyini dərk edir, onu ABŞ-in hədsiz tələblərinə və hökmranlıq siyasətinə qarşı müqavimətin rəmzi kimi qiymətləndirir.

O, milli müstəqilliyin və qüdrətin dəyərini vurğulayaraq hazırkı həssas şəraitdə bu qiymətli nailiyyətin qədrinin bilinməsinin vacibliyini diqqətə çatdırıb. Həmçinin xarici düşmənlərin və onların ölkə daxilindəki əlaltılarının fitnə və təxribatlarının ölkənin mövqeyinə və nüfuzuna xələl gətirməsinə yol verilməməli olduğunu bildirib.

Əhli sünnə məzhəbinin xadimi Mamusta Məhəmməd Əmin Rasti sonda düşmənlərin ölkənin siyasi mühitində çaşqınlıq yaratmağa yönəlmiş cəhdlərinə toxunaraq qeyd edib ki, tarixin bu həssas mərhələsinin uğurla geridə qoyulması vahid mövqenin qorunmasını, milli həmrəyliyin gücləndirilməsini, eləcə də məsul şəxslərlə xalq arasında qarşılıqlı anlaşma və həmrəyliyin möhkəmləndirilməsini tələb edir. O vurğulayıb ki, bu birlik və həmrəyliyin qorunması sayəsində düşmənlərin fitnə və təxribatlarını zərərsizləşdirmək, İranın qüdrətinin daha da artması üçün əlverişli zəmin yaratmaq mümkündür.

Xəbərin sonu

Etiketlər

Rəyiniz

You are replying to: .
captcha